Diario Vasco-ren lerroburua (2020-03-04), Espainiako Ministro Kontseiluak onartu berri duen legearen zirriborroaz1 albiste emateko:
Baiezkoa beharrezkoa izango da, baita ezkon-harremanetan ere.
(itzulpena nirea da: baita ere horren ordaina incluso zen egunkarian)
Honako hau, berriz, Twiterren irakurria, aurrekoa baino bi egun lehenago:
DBHko 1. kurtsoko neskatxa batek mezua idatzi die bere lagun mutilei, esanez ezabatu egin behar dituela denen izenak mugikorreko kontaktuetatik… Ez dela ezer pertsonala, bere mutil-lagunak (“su novio”, txioa gaztelaniaz zen) hala exijitzen diolako dela.
Lehenengoa, kazetari heldu batek idatziko zuen; editore helduren batek gainbegiratuko zuen gero; eta gure periodikuaren arduradun helduren batek onetsiko zuen azkenean. Gizasemeak, denak? Seguru asko…
Bigarrena, bi neraberen artekoa da: mutilak argi dauka, bistan da, zein eskubide dituen harreman hasiberrian –ezkon-itunik gabeko harremana izanik ere.
Errealitate beraren bi adibide baino ez: “zain zaharraren usaina” esaten dio Mokoroaren hiztegiak (edo, gaztelaniaren bide beretik, “hautsok ekarriko dituzten lohiak”). Bada, errealitate hori aldatzeko, sakon sustraitutako zain zaharra lurretik ateratzen izango ditugu lanik handienak.