Lanzarote beltza, suzkoa, koloretsua… Afrikan, ozeanoaren erdian. Hondartzak, itsasoa, zerua; haizea, paisaia etengabe eraldatzen duen haizea; Geriako lur beltzeko mahastiak arratseko argiaren kontrastepean; Timanfayako lur goriak, oraino ketan; etxeen zuria, labaz estalitako malpaís-eko itsasargi; kaktusak eta harkaitz bolkanikoen testura latzak; uharteari César Manriquek emandako eite desberdina; Saramagoren lantokia; Punta Mujeres-eko emakumeak kirolean, gizona arrantzan denbora-pasa… Lanzarote fotogenikoa, hegoaldeko Islandia txikia Atlantiko epelagoan.
Joan den apirilean uharte eder horretan egindako egonaldi laburretik argazki mordo batekin itzuli nintzen, eta horietako batzuekin liburu bat autoeditatu dut, Blurb-en: 33 x 28 cm, 84 orrialde, azal lodia, 148 g/m²-ko paper iztukatugabean inprimatua1. Irudiak disko gogorreko espetxetik argitara ateratzeko modu bat, argazkiek paperean duten xarma gaindiezina dastatzeko aukera eskaintzen duena.
Hor duzu liburuaren azala; gainean klik eginda, orrialdeetan zeharko ikustaldia egin ahal izango duzu, eta pantaila osoan nahi izanez gero (horretarako, egin klik hasi aurretik liburuaren irudiaren gaineko ikono txikian). Ea gustuko duzun.